უცხოური მედიის ინფორმაციით, უკრაინული ხორბლით დატვირთულმა პირველმა ხომალდმა ოდესა დატოვა. გემი 26 ათასი ტონა მარცვლეულით არის დატვირთული.
„უკრაინამ ჩვენს პარტნიორებთან ერთად დღეს გადადგა მორიგი ნაბიჯი მსოფლიო შიმშილის შესაჩერებლად“, – განაცხადა უკრაინის ინფრასტრუქტურის მინისტრმა ალექსანდრ კუბრაკოვმა.
როგორც ცნობილია, უკრაინული ხორბლის ექსპორტის განახლების შესახებ შეთანხმება გაერო-სა და თურქეთის შუამავლობით უკრაინასა და რუსეთს შორის 22 ივლისს გაფორმდა.